Negros Occidental – Sugatan ang dalawang operatiba ng Moises Padilla Municipal Police Station matapos mabaril ng suspek sa isinagawang buy-bust operation sa Sitio Sapa, Barangay Magallon Cadre, Moises Padilla, bandang 10:40 ng gabi, ika-17 ng Mayo 2023.
Kinilala ni Police Major Joevito Bose, Hepe ng Moises Padilla MPS, ang suspek na si Jeffrey Cabato alyas “Agi”, 35, bagong tukoy na Street Level Individual at residente ng nabanggit na lugar.
Ayon kay PMaj Bose, habang isinasagawa ang naturang operasyon ay nakatunog ang suspek na mga pulis pala ang ka-transakyon nito, na kung saan ay nagawa nitong makatakas at mabaril ang dalawang operatiba gamit ang hindi pa matukoy na kalibre ng baril.
Kinilala ang dalawang PNP personnel na sina Police Corporal Victor Leaño, na nagtamo ng tama sa kanyang kaliwang paa at si Police Corporal Artemio I Napao II naman ay nagtamo ng tama sa kanyang kanang binti.
Nadala agad sa Queen of Mercy Hospital ang dalawang PNP personnel at nasa stable condition na ngayon.
Dagdag pa, narekober sa nasabing buy-bust ang humigit kumulang 5 gramo ng suspected shabu na nagkakahalaga ng Php34,000, isang lighter, 1 purple scissor, at isang rolyo ng foil.
Kasalukuyan pa rin ngayon ang hot pursuit operation ng Moises Padilla MPS upang matukoy ang pinagtataguan ng nakatakas na suspek.
Ang buwis buhay na pagsisilbi at pagseserbisyo ng ating kapulisan ay isang patunay na hindi tumitigil ang PNP upang tuluyang mapuksa ang ilegal na droga sa ating bansa.
