Cotabato – Arestado ng Cotabato PNP ang dalawang Most Wanted at High Value Persons kasama ang isang armadong indibidwal sa isinagawang intel-driven operation sa Purok 7, Brgy. Dungguan, M’lang, Cotabato noong ika- 24 ng Hulyo 2022.
Kinilala ni PBGen Alexander Tagum, Regional Director ng Police Regional Office 12 (PRO12), ang mga naarestong suspek na si Jimmy Talimbo, 61, kanyang anak na 34-anyos na si Mohar Talimbo na lumabag sa Sec. 11 Art. 2 ng RA 9165 at ang kapatid niyang si Nasrudin Talimbo na armado ng matataas na kalibre ng baril at pawang residente ng nasabing lugar.
Ayon kay PBGen Tagum, naaresto ang tatlong indibidwal sa pinagsanib puwersa ng Cotabato Police Provincial Office, Regional Intelligence Division 12, Regional Special Operation Group 12, 4th Special Action Battalion SAF, Regional Mobile Force 12, Kidapawan CPS at M’lang MPS.
Ayon pa kay PBGen Tagum, naaresto ang tatlong suspek sa bisa ng Warrant of Arrest at Search Warrant laban kay Jimmy sa kasong 2 Counts of Murder, at kasong paglabag sa Sec. 11 Art. 2 of RA 9165 o ang “Comprehensive Dangerous Drugs Act of 2002” naman sa anak nito.
Bukod dito, nahulihan din ang mag-ama ng anim na piraso ng plastic sachet na naglalaman ng shabu, dalawang M16 Automatic Assault Rifle na may mga nakasalpak pang magazine at bala at isa pang Improvised Explosive Device (IED).
Habang ang armadong kapatid naman nito ay nahulihan ng isang Caliber .45 pistol, isang magazine ng Cal. 45 at isang magazine ng M16 na may kasamang bala.
“Sa patuloy na pagsasagawa ng Law Enforcement Operations, tinitiyak ng PRO 12 na ang mga hakbang nito ay palaging naaayon sa Police Operational Procedures at ang kinakailangang halaga ng puwersa lamang ang ilalapat at laging isinasaalang-alang ang kahalagahan ng karapatang pantao at buhay ng tao gaya ng pagpapahalaga sa aming mandato. Patuloy naming ipapatupad ang mandatong ito hanggang sa ang lahat ng mga takas na kriminal ay madala sa kulungan,” ani PBGen Tagum.
###
Panulat ni Patrolman Khnerwin Jay A Medelin
