Makati City — Arestado ang dalawang menor de edad dahil sa pananaksak sa isang 21-anyos na lalaki sa Makati City nito lamang Linggo, Mayo 29, 2022.
Kinilala ni Southern Police District Director, Police Brigadier General Jimili Macaraeg ang mga suspek na sina alyas “AJ”, 15, at alyas “Rey”, 14, parehong mga estudyante,
Ayon kay PBGen Macaraeg, naganap ang krimen bandang 7:00 ng umaga at sila’y naaresto sa kahabaan ng Corpuz St., West Rembo, Makati City ng mga tauhan ng Makati City Police Station sa tulong ng Bantay Bayan.
Sa inisyal na imbestigasyon, bago ang insidente ng pananaksak, ang mga menor de edad ay nagkaroon ng mainit na pagtatalo kasama ang grupo ng kanilang biktima na si Mark Omega at kalaunan ay umalis.
Subalit bumalik ang dalawa at kinumpronta ang biktima at sa hindi malamang dahilan ay pinagsasaksak nila ito na nagtamo ng mga sugat sa iba’t ibang bahagi ng katawan.
Agad namang isinugod ang biktima sa ospital ng Makati.
Ayon pa kay PBGen Macaraeg, narekober kina alyas “AJ” at “Rey” ang tactical knife na may sukat na humigit-kumulang anim na pulgada ang haba kasama ang hawakan.
Pansamantalang itinurn-over sa Bahay Pag-Asa ang dalawang menor de edad na suspek.
“It is very alarming that the suspects are both minors kung saan walang pinipiling edad, lugar o oras para mambiktima. Malaking bahagi at tungkulin din para sa mga magulang/guardian na sila ay dapat manguna sa pagbabantay sa kanilang mga anak at tamang paggabay sa lahat ng kanilang ginagawa. Pinapaalalahanan ko ang publiko na maging mas mapagmatyag sa inyong paligid. Huwag mag-atubiling humingi ng tulong sa inyong pinakamalapit na istasyon ng pulisya at iulat ang anumang insidente na makasasama sa iyong kaligtasan at seguridad”, ani PBGen Macaraeg.
Source: SPD PIO
###
Panulat ni PSSg Remelin M Gargantos
