General Santos City – Arestado ng AVSEGROUP Mobile Patrol Security Unit 12 ang dalawang lalaking suspek dahil sa umano’y pagnanakaw sa General Santos City International Airport Complex noong Abril 27, 2023, habang ang isa pang suspek ay nananatiling nakalaya.
Kinilala ni Police Brigadier General Jerry F Bearis, Director ng AVSEGROUP, ang mga suspek na sina Michael Balog Budal, 28, at Jay-Jay Laan Casio, 32, kapwa residente ng Barangay Tbolok, Tboli, South Cotabato, kasama si Harold Odos Bahal na di pa nahuhuli.
Ayon kay PBGen Bearis, naaresto ang dalawang suspek matapos silang mahuli sa aktong pagnanakaw ng anim (6) na baterya ng trak sa Motor Pool of Civil Aviation Authority of the Philippines sa General Santos International Airport, Barangay Fatima, General Santos City.
Pinuri naman ni PBGen Bearis, ang mga tauhan na nasa likod ng matagumpay na pagkakadakip sa mga nasabing suspek at binalaan ang mga salarin na walang lugar ang krimen sa lahat ng paliparan dahil nananatiling matapang at mapagmatyag ang AVSEGROUP na pigilan ang anumang uri ng ilegal na gawain ng mga ito.
