Davao Region – Arestado ang dalawang lalaki sa magkahiwalay na operasyon ng mga tauhan ng PNP sa kasong paglabag sa COMELEC Gun Ban sa Davao Region sa araw ng halalan, Mayo 9, 2022.
Kinilala ang mga naarestong suspek na sina Jonathan Ventura, 49, residente ng Purok 9, Dalisay, Brgy. Poblacion, Mawab, Davao De Oro at Mel Karlo Sumalinab, 22, na residente naman ng Paradan Compound, Poblacion, Lupon, Davao Oriental.
Ayon kay PLtCol Clifford John Nabor, Chief, Provincial Intelligence Unit-Davao de Oro, naaresto si Ventura matapos makuhaan ng isang caliber .45 na baril habang dumadaan sa COMELEC checkpoint sa Brgy. Poblacion, Mawab, Davao De Oro.
Samantala, ayon naman kay PMaj Butch Kevin Rapiz, OIC ng Lupon Municipal Police Station, naaresto si Sumalinab dahil sa pagdadala nito ng folding knife sa Market Avenue Street, Brgy. Poblacion Davao Oriental sa mismong araw ng eleksyon.
Ang dalawang suspek ay nahaharap sa kasong paglabag sa COMELEC Gun Ban dahil sa pagdadala ng mga nakamamatay na kagamitan.
Mahigpit pa ring ipinapatupad ng PRO 11 ang COMELEC Gun Ban sa rehiyon onse upang masiguro ang kaligtasan ng bawat isa.
###
Panulat ni Patrolman Alfred Vergara
