Patuloy ang kapulisan sa maigting na operasyon laban sa kriminalidad at pagdadala ng hindi lisensyadong baril.
Ito ay nagresulta sa pagkakaaresto sa dalawang (2) lalaki pagkatapos mahulihan ng iligal na baril sa Barangay Naganacan ng Cauayan City, Isabela noong ika-25 ng Oktubre, 2021.
Kinilala ang mga suspek na sina Cyrus Baligod, 43 anyos; at Virgilio Ramos, 44 anyos, pawang residente ng nabanggit na lugar.
Batay sa imbestigasyon ng Cauayan City Police Station, sa pamumuno ni PLtCol Sherwin F Cuntapay, Chief of Police, ang mga suspek umano’y nagpaputok ng baril sa naturang lugar na nagdulot ng komosyon at takot sa mga residente.
Nakumpiska kay Baligod ang tatlong (3) calibre .45, isang (1) rifle, iba’t ibang magasin at mga bala. Samantala, narekober naman kay Ramos ang isang calibre .40 na may magasin at 13 na bala.
Ang nakumpiskang mga ebidensya ay nasa kustodiya ng Cauayan CPS para sa tamang disposisyon kasama ang mga suspek na haharap sa kasong Illegal Discharge of Firearm at paglabag sa RA 10591.
Source: Isabela PPO
#####
Article by Police Corporal Carla Mae P Canapi
