Cebu City – Arestado ng kapulisan ng Cebu City Police Office ang dalawang lalake at nakumpiska mula sa kanila ang nasa Php680,000 halaga ng shabu sa buy-bust operation sa Sitio Puntod, Brgy. Mambaling, Cebu City noong Martes, Hunyo 20, 2023.
Ayon kay Police Colonel Ireneo Dalogdog, City Director, ang subject ng operasyon na kinilalang si “Neve”, 24, ng Sitio Silangan Mc. Arthur St. Brgy. San Roque, Cebu City at ang kasama nitong si “Dick”, 41, ng Sitio Manga, Brgy. Tisa, Cebu City ay nadakip makaraang makatransaksyon at mapagbentahan ng droga ang nagpanggap na poseur buyer.
Ayon pa kay Police Colonel Dalogdog, ang operasyon ay ikinasa ng mga tauhan ng Police Station 11 dakong alas-12:30 ng madaling araw sa pangunguna ni Police Major Jonathan Bethooven Taneo, Station Commander.
Narekober sa operasyon ang tinatayang nasa 100 gramo ng hinihinalang shabu na may Dangerous Drug Board na Php680,000.
Nakakulong ngayon ang mga suspek sa PS 11, CCPO at nahaharap sa mga kaukulang reklamo kaugnay sa ilegal na droga.
Kaugnay dito, pinuri at muling hinikayat ni Police Colonel Dalogdog ang buong kapulisan ng lungsod sa patuloy na paghahatid ng maayos at mahusay na serbisyo para sa tiyak na kaayusan, kaligtasan, at kapayapaan ng komunidad.
