Arestado ang dalawang indibidwal sa pangongotong sa mga deliveries sa KCC Mall sa Notre Dame Avenue, Barangay Rosary Heights 2, Cotabato City nito lamang ika-23 ng Marso 2025.
Kinilala ni Police Captain Rustan Deaño, Station Commander ng Cotabato City Police Station 1, ang dalawang suspek na sina alyas “Bodjack”, 49 anyos, at alyas “Turting”, 49 anyos, na pawang mga residente ng nasabing lugar.
Ayon kay PCpt Deaño, umabot sa pitong delivery truck ang nakotongan ng mga grupo ng suspek na umabot ng Php44,000.
Napag-alaman ang dalawang naarestong suspek ay dati nang nakulong dahil sa mga kasong may kaugnayan sa ilegal na droga at nahaharap ang mga suspek sa kasong Robbery Extortion.
Samantala, pinaalalahanan ng Cotabato City PNP ang publiko, partikular ang mga negosyante at delivery personnel, na agad ipagbigay-alam sa mga awtoridad ang anumang insidente ng pangongotong upang agarang maaksyunan at mapanatili ang kapayapaan at kaayusan sa lungsod.
Panulat ni Patrolwoman Ma. Señora Agbuya
