Bacolod City – Timbog ang dalawang High Value Individual sa isinagawang drug buy-bust operation ng Bacolod City PNP nito lamang madaling araw ng Setyembre 24, 2022.
Kinilala ni Police Lieutenant Joven C Mogato, Chief ng City Drug Enforcement Unit- Bacolod City Police Office, ang mga suspek na sina Erwin Belonio y Bulabon alyas Boy (HVI), 34, walang asawa, residente ng Zone 11, Brgy. Handumanan, Bacolod City at si Anthony Solon y Mayo alyas Tiboy (HVI), 38, residente naman ng Prk. Riverside, Brgy. Bata, Bacolod City.
Ayon kay PLt Mogato, nahuli ang mga suspek matapos magsagawa ng entrapment operation ang mga operatiba ng Bacolod CPO-City Drug Enforcement Unit sa Purok Riverside, Brgy. Bata ng nasabing lungsod.
Dagdag pa ni PLt Mogato, nakumpiska kay Belonio ang isang piraso ng sling bag na may lamang siyam na piraso ng heat-sealed transparent plastic sachet ng hinihinalang shabu at anim pang piraso ng knot-tied transparent plastic bag ng hinihinalang shabu. Habang isang piraso naman na heat-sealed transparent plastic sachet ng shabu ang nakuha sa kanyang kasamahan na si Solon.
Ayon pa kay PLt Mogato, nasa humigit kumulang 675 grams ang bigat ng lahat ng mga nakumpiskang droga at tinatayang may Standard Drug Price na Php4,590,000.
Nahaharap ang mga suspek sa kasong paglabag sa Section 5, 11, at 26 sa Article II ng RA 9165 o Comprehensive Dangerous Drugs Act of 2002.
Ang PNP ay patuloy na papaigtingin pa ang iba’t ibang kampanya laban sa lahat ng uri ng mga ipinagbabawal na droga upang matiyak ang kaligtasan ng komunidad sa lahat ng sulok ng bansa.
