Iloilo City – Balik ngayon sa kulungan ang 2 High Value Individual matapos muling mahuli sa buy-bust operation ng City Drug Enforcement Unit at Iloilo City Police Station 3 sa Brgy. Desamparados, Jaro, Iloilo City, bandang ala-8:32 ng gabi ng Agosto 24, 2023.
Ang dalawang drug suspek ay kinilalang sina alyas “Panoy”, 45 at si alyas “Macky”, 32, parehong residente ng nabanggit na lugar.
Nakuha sa posesyon ng mga suspek ang 10 pakete na naglalaman ng pinaghihinalaang shabu kabilang ang buy-bust item na may bigat na 50 gramo at nagkakahalaga ng Php340,000.
Narekober din sa nasabing operasyon ang isang Php20,000 buy-bust money, isang unit ng homemade 12-gauge shotgun na may kasamang isang bala, coin purse, isang android cellular phone, isang weighing scale, lighter, at isang gunting.
Ayon kay Police Lieutenant Colonel Antonio Benitez Jr., Hepe ng CDEU, dati nang nakulong ang mga suspek dahil sa ilegal na droga noong 2016 ngunit nakalabas noong 2019 sa plea bargaining.
Mahaharap ang mga suspek sa kasong paglabag sa RA 9165 (Comprehensive Dangerous Drugs Act of 2002) at RA 10591 (Illegal possessions of Firearm).
Ang kapulisan ng Iloilo City ay patuloy na paiigtingin ang kampanya kontra ilegal na droga at kriminalidad para sa mas mapayapa at ligtas na komunidad.
