Cebu City – Arestado ang dalawang ginang sa Cebu City matapos maaresto sa buy-bust operation ng mga operatiba ng Police Station 6, Cebu City Police Office noong Mayo 9, 2023.
Kinilala ni Police Major Francis Renz Talosig, Station Commander ang mga naaresto na si “Marne”, 25, at “Rose Marie”, 33.
Ayon kay Police Major Talosig, bandang alas-5:45 ng hapon nang ilunsad ng mga operatiba ang operasyon sa tinitirahan ng mga suspek sa Sitio Tarcom, Brgy. Busay ng nasabing lungsod.
Agad naman na naaresto ang mga ito makaraang makabili sa kanila ang pulis na nagpanggap na poseur buyer ng droga.
Nakumpiska sa naturang operasyon ang nasa 40.48 gramo ng hinihinalang shabu na may Standard Drug Price na Php275,264 at ang nagamit na buy-bust money.
Kapwa nahaharap ang mga naaresto sa patung-patong na reklamo na may kaugnay sa ilegal na droga.
Pinuri at muling hinikayat naman ni Police Colonel Ireneo Dalogdog, City Director ng Cebu City Police Office, ang buong kapulisan ng Cebu City para sa pagpapatuloy ng maayos at mahusay na pagsasakatuparan ng kampanya kontra ilegal na droga at maging sa lahat ng uri ng kriminalidad.
