Taguig City — Arestado ang dalawang Chinese Nationals sa isinagawang entrapment operation ng mga tauhan ng Taguig City Police Station nito lamang Sabado, Enero 14, 2023.
Kinilala ni PBGen Kirby John Kraft, District Director ng Southern Police District, ang mga suspek na sina Fei, 40 at Haikang, 32.
Ayon kay PBGen Kraft, bandang 5:00 ng madaling araw nang maaresto ang mga suspek sa harap ng main entrance ng XYLO, Uptown Parade, BGC, Brgy. Fort Bonifacio, Taguig City ng mga tauhan ng Sub-Station 1 ng Taguig CPS.
Ayon pa kay DD SPD, nagsimula ang insidente matapos iulat ng complainant na si Aska Abigail Yamamoto y Bete, Filipina, 32 taong gulang, Casino Dealer na siya ay biktima ng robbery hold-up noong Enero 12, 2022 bandang 5:00 ng madaling araw at ayon pa sa biktima, humihingi pa ng Php20,000 ang mga suspek para ibalik ang kanyang mga personal na gamit.
Nang isagawa ang operasyon, nakumpiska sa mga suspek ang isang Cebuana Bank Card, PhilHealth ID, Vaccination Card, passport card, pink iPhone 13, maroon coin purse, gold cigarette case, isang genuine na Php1,000 at 19 piraso na pekeng Php1,000.
Samantala, narekober din sa isinagawang procedural body search sa mga suspek ang tatlong heat-sealed transparent plastic sachet na naglalaman ng hinihinalang shabu na humigit kumulang 3.3 gramo at may Standard Drug Price value na Php22,440.
Mahaharap ang mga suspek sa kasong Robbery Hold-up at RA 9165 o Comprehensive Dangerous Drugs Act of 2002.
Ang PNP ay walang pinapanigan sa pagganap ng tungkulin at pagpapalaganap ng katahimikan sa bansa. Lalo rin nilang pananaigin ang patas na pagbibigay ng hustisya sa mga biktima.
Source: SPD PIO
Panulat ni PSSg Remelin M Gargantos
