Sarangani – Huli ang dalawang carnapper matapos maharang sa isinagawang checkpoint ng Regional Mobile Force Battalion (RMFB) 12 sa Brgy. Malungon Gamay, Malungon, Sarangani Province, bandang 4:00 ng madaling araw nito lamang Nobyembre 3, 2023.
Kinilala ang dalawang suspek na sina alyas “Alfredo”, 40, construction worker, residente ng Brgy Labangal, General Santos City; at alyas “Christopher”, 33, driver at residente ng Klinan 6, Polomolok, South Cotabato.
Batay sa report, ang dalawang suspek ay lulan ng sasakyang Honda Civic nang maharang ng RMFB 12 at walang maipakitang dokumento sa sakay nilang pira-pirasong pyesa ng motorsiklo na pinaniniwalaang kinarnap ng mga suspek.
Sa patuloy na pagsisiyasat, narekober pa mula sa bulsa ng pasaherong si alyas “Alfredo” ang plastic sachet na naglalaman ng hinihinalang shabu na may bigat na humigit-kumulang limang gramo na may Standard Drug Price na Php34,000.
Dahil rito mahaharap ang dalawang suspek sa kasong paglabag sa R.A. 10883 (Anti Carnapping Act of 2016) at kasong may kaugnayan sa ilegal na droga.
Patunay lamang na mas pinaigting ng RMFB 12 ang pagpapatupad ng Checkpoint katuwang ang iba pang ahensya ng pamahalaan para matiyak ang kapayapaan at kaligtasan ng komunidad.
Panulat ni Patrolman Khnerwin Jay A Medelin
