Sa pakikipag-ugnayan ng kapulisan sa komunidad ay mabilis na naaresto ng mga tauhan ng Mabalacat MPS ang dalawang carnapper sa loob ng Clark Freeport Zone, Mabalacat City, Pampanga noong ika-5 ng Oktubre.
Ayon sa ulat, kinilala ang mga suspek na sina Joel Maniego y David, 42 taong gulang, at si Angelica Salas y Suarez, 39 taong gulang, live-in partner, walang trabaho at parehong residente ng Block 20, Lot 7, Metro Subdivision, Barangay Anupul, Bamban, Tarlac.
Narekober ng mga pulis ang ninakaw na sasakyan na isang gray Volkswagen na may plakang CAO-1041.
Nahuli ang mga suspek matapos namataan ang nasabing sasakyan na nakaparada sa parking area ng Casino Hotel sa loob ng Clark Freeport Zone.
Isiniwalat sa imbestigasyon na ang nagmamay-ari ng nasabing sasakyan ay si Carlota Reyes y Cunanan, 51 taong gulang, balo, beautician, at residente ng Brgy. Tabun, Mabalacat City.
Ayon sa biktima, noong ika-22 ng July taong kasalukuyan ay nagsampa siya ng reklamo laban sa dalawang Korean National na sina Hwa, Il Young alyas Hwang at si Ki Young alyas Mr. Philip. Dagdag pa niya ang dalawang koreano ang nagrenta sa kanyang sasakyan at hindi na nila ito isinauli sa kanya. Pinagpasapasahan umano ng kanyang sasakyan hanggang sa hawak na ito ng mga nahuling suspek. Ibinunyag din ng biktima na bago ang pagkakaaresto ng mga suspek ay nakatanggap siya ng mga tawag at text mula kay Angelica Salas na nanghihingi ng Php200,000 na kapalit ng pagbabalik ng kanyang sasakyan. Kaya agad siyang nakipag-ugnayan sa Mabalacat MPS at nagsagawa ng entrapment operation na nagresulta sa mabilis na pagkaaresto ng mga suspek.
####
Article by Patrolwoman Maria Elena S Delos Santos
