Bacolod City – Ninakaw mula sa mga tauhan ng Pambansang pulisya ang dalawang baril na narekober ng mga awtoridad sa apat na miyembro ng Communist Party of the Philippines-New People’s Army (CPP-NPA) na namatay sa engkwentro nitong Hulyo 6, 2022 sa Binalbagan, Negros Occidental.
Ayon kay Police Lieutenant Judesses Catalogo, Acting Spokesperson ng Negros Occidental Police Provincial Office (NOCPPO), ang dalawang baril ay ninakaw ng mga rebeldeng komunista sa magkahiwalay na pag-atake nito sa Negros Island noong 2008 at 2010.
Dagdag pa ni PLtCol Catalogo, na sumailalim ang naturang mga baril sa ballistic examination ng NOCPPO forensics unit para sa microetching at ballistics comparison, upang matukoy kung nagamit na ba ang mga ito sa iba pang mga krimen.
Lumalabas sa imbestigasyon na naka-isyu ang caliber .45 pistol kay Police Staff Sergeant Ranulfo Sarsaba Estrada ng Guihulngan City Police Station sa Negros Oriental at dating naka-assign sa La Libertad Municipal Police Station. Matatandaang nilusob ng nasa 40 miyembro ng rebeldeng grupo ang nasabing istasyon noong November 3, 2008.
Samantala, naka-isyu naman ang Springfield M14 rifle kay Police Corporal Jose Ray Bringuez, dating naka-assign sa Sipalay City Police Station. Nakuha naman ito nang grupo nang lumusob ang nasa 30 miyembro ng CPP-NPA sa isang Community Police Assistance Center sa Barangay San Jose noong Abril 30, 2010.
Dagdag pa ni PLt Catalogo na isang malaking kasinungalingan ang sabihing hindi lehitimo ang isinagawang security operation ng mga tropa ng pamahalaan sapagkat armado ang nasabing mga namatay, at nakaw pa ang kanilang mga armas mula sa mga tauhan ng Pambansang pulisya.
###
