Parañaque City — Tiklo ang dalawang babae sa kasagsagan ng pagdiriwang ng bagong taon sa isinagawang buy-bust operation ng Parañaque City Police Station dahil sa tinatayang Php374,000 halaga ng shabu na dapat sana’y kanilang ipagbibili.
Kinilala ni PBGen Kirby John B Kraft, District Director ng Southern Police District, ang dalawang suspek na sina alyas “Lanie”, 22 at alyas “Sophia”, 23.
Ayon kay PBGen Kraft, bandang alas-3:25 ng hapon sa kahabaan ng Head line St. Fourth State Brgy. San Antonio, Parañaque City nang mahuli ang dalawa ng mga operatiba ng Parañaque CPS kasama ang mga tauhan ng BF Homes Police Sub-station.
Apat na heat-sealed transparent plastic sachet ang nasamsam sa kanila na pinaniniwalaang shabu na humigit kumulang 55 gramo at may Standard Drug Price (SDP) na Php374,000.
Nakuha rin sa kanila ang authentic na isang libong piso at anim pang pekeng piraso nito na ginamit bilang buy-bust money, at isang brown na shoulder bag.
Paglabag sa Sec. 5 at Sec. 11, Art. II ng R.A. 9165 o Comprehensive Dangerous Drugs Act of 2002 ang kanilang kahaharapin.
Sinisigurado naman ng PNP na ngayong 2023 ay mas lalo pa nilang paghihigpitan at paiigtingin ang kampanya kontra ilegal na droga sa bansa upang makamit ang ligtas at drug free na bansa.
Source: SPD PIO
Panulat ni PSSg Remelin M Gargantos
