General Santos City – Arestado ng General Santos City Police Station 4 ang dalawang lalaki matapos maaktuhang ninanakaw ang kable ng PLDT, Inc. (Philippine Long Distance Telephone Company) sa Lotus Subdivision, Guinto St. Brgy. San Isidro, General Santos City noong ika-17 ng Setyembre 2023.
Kinilala ni Police Captain Danny Balofiños, Station Commander ng General Santos City Police Station 4, ang dalawang suspek na sina alias “Renato”, 58, may asawa, at residente ng Poblacion Mawab, Compostela Valley; at alyas “Elmo”, 44, may asawa at residente naman ng Malandag, Malungon Sarangani Province.
Dakong 8:30 ng gabi nang inireklamo ng Field Technician ng PLDT Telecom Company ang ginagawang pagnanakaw ng mga suspek sa kanilang kable.
Agad namang nirespondehan ng pulisya at naaktuhan ang ginagawang pagnanakaw ng mga suspek subalit agad namang kumaripas ng takbo nang mamataan ang mga awtoridad ngunit nakorner ang mga ito.
Aabot sa 50 pares ng PLDT copper cable na nasa higit 80 metro ang haba na may tinatayang halaga na Php50,000, mga kagamitan na ginamit sa pagnanakaw at isang Mitsubishi L300 Van, ang narekober mula sa dalawang suspek.
Patuloy ang GenSan PNP sa pagpapatupad ng mga batas upang masigurong payapa, ligtas at maayos ang ating komunidad.
