Arestado ang 18 na mga indibidwal matapos magsagawa ng Anti-Illegal Gambling Operation ang Southern Police District sa Tengco Street at Hayes Street, Barangay Pio Del Pilar, Makati City nito lamang Biyernes, ika-12 ng Hulyo 2024.
Kinilala ni Polie Brigadier General Leon Victor Z Rosete, District Director ng SPD, ang mga naarestong suspek na sina alyas Roberto, card dealer, 52 anyos; alyas Ronaldo, card dealer, 37 anyos; Fe, maintainer, 66 anyos; Erlinda, financier, 40 anyos; Gabriel, card dealer, 38 anyos; Ronald, bettor, 57 anyos; Zenaida, bettor, 72 anyos; Aurora, bettor, 53 anyos; Wilberto, bettor, 45 anyos; Moises, bettor, 54 anyos; Dolores, bettor, 67 anyos; Edgar, bettor, 59 anyos; Oscar, spotter/gater, 44 anyos; Maria, helper/maintenance, 38 anyos, single; Lando, gater/maintenance, 55 anyos; Garry, bettor, 46 anyos; Freddie, bettor, 47 anyos; at alyas James, bettor, 24 anyos.
Naganap ang operasyon dakong 1:00 ng madaling araw sa pinagsanib puwersa ng District Special Operations Unit-Southern Police District (DSOU-SPD), sa koordinasyon ng District Intelligence Division-Southern Police District (DID-SPD) at Sub Station 3 Makati City Police Station.
Nahuli ang mga suspek sa aktong naglalaro ng sakla, at narekober ang iba’t ibang kagamitan sa pagsusugal, kabilang ang isang set ng Spanish card na nakakabit sa isang kahoy na tabla na may mga numero mula 1 hanggang 9 (dehado) isang metal stand (pananda), isang booklet na may mga salitang “Entrada” at “Salida” (Bloc), isang deck ng baraha para sa paglalaro ng sakla, isang tela para sa deck ng mga baraha (tapete), apat na papel na baraha kasama ang mga piraso ng tile (koto), isang kahoy na kahon na naglalaman ng tatlong set ng card para sa paglalaro ng Sakla, isang yellow pad na nagpapahiwatig ng mga halaga para sa financier para sa bawat set ng laro (Tong) at tayang pera na nagkakahalaga ng Php11,755.
Ang mga naarestong suspek ay mahaharap sa mga reklamo para sa paglabag sa Presidential Decree 1602.
Matatag na ipinangako naman ng SPD na hindi titigil sa pagpuksa ng mga aktibidad ng ilegal na pagsusugal sa Southern Metro Manila para sa isang mapayapa at ligtas na komunidad.
Source: SPD PIO
Panulat ni PSSg Remelin M Gargantos
