Arestado ng mga awtoridad ang isang 18-anyos na binata matapos isilbi ng Manaoag Police Station ang Warrant of Arrest sa kasong Online Exploitation sa Barangay Inmanduyan, Laoac, Pangasinan noong Pebrero 24, 2025.
Kinilala ni Police Major Peter Paul V Sison, Officer-In-Charge ng Manaoag PS, ang suspek na si alyas “Romy”, residente ng Barangay Inmanduyan, Laoac, Pangasinan.
Naaresto ang suspek sa bisa ng Warrant of Arrest ng mga operatiba ng Intelligence and Warrant/Subpoena PNCOs ng Manaoag PS.
Si Romy ay nahaharap sa kasong paglabag sa Section 4(A) ng Republic Act No. 11930 o ang “Anti-Online Sexual Abuse or Exploitation of Children” (OSAEC) and “Anti-Child Sexual Abuse or Exploitation Materials” (CSAEM) Act na walang kaukulang piyansa.
Ang matagumpay na operasyong ito ay patunay ng mas pinaigting na kampanya ng pamahalaan sa ilalim ng Bagong Pilipinas laban sa mga kriminal na lumalabag sa karapatan ng kabataan. Sa pamamagitan ng mabilis at mas epektibong pagpapatupad ng batas, naipapakita na walang puwang ang mga abusado sa isang bansang naglalayong magtaguyod ng kaligtasan, kaayusan, at katarungan.
Source: Manaoag Police Station
Panulat ni PMSg Robert Basan Abella Jr
