Ipinagdiwang ng Puerto Princesa City Police Office (PPCPO) ang ika-16 na anibersaryo nito na may temang “Serbisyong PPCPO, Mula Noon hanggang Ngayon” na ginanap sa Balayong People’s Park, Barangay Sta Monica, Puerto Princesa City, Palawan nito lamang ika-20 ng Oktubre 2024.
Ang naturang pagdiriwang ay pinangunahan ni Police Colonel Ronie S Bacuel, City Director. Dumalo at nakiisa rin sa kaganapan ang iba’t ibang ahensya ng gobyerno, mga estudyante mula sa iba’t ibang paaralan, at mga organisasyon, pati na rin ang mga pribadong indibidwal.
Bilang bahagi ng pagdiriwang ay nagsagawa ng 3Km Fun Run at pagkatapos nito ay nagkaroon din Zumba session, na nagbigay ng pagkakataon sa mga kalahok na mag-enjoy at mag-relax. Ang programa ay nagtapos sa pagbibigay ng Certificate of Appreciation sa mga nagwagi at sa lahat ng mga dumalo, bilang pagkilala sa kanilang suporta at partisipasyon.
Ayon kay PCol Bacuel, ang matagumpay na Fun Run na ito ay hindi lamang simbolo ng pagkakaisa kundi pati na rin ng pagtutulungan bilang isang komunidad. Ang sama-samang pagsisikap ay nagbubukas ng mas maraming oportunidad para sa bawat mamamayan.
Ang aktibidad na ito ay nagpapakita lamang ng patuloy na pagsulong ng kapayapaan at kaunlaran sa lungsod ng Puerto Princesa na sila ay kabahagi ng pagbabagong hangad sa bansang Pilipinas.
Source: Puerto Princesa City Police Office
Panulat ni Patrolwoman Ana Rose D Guadaña
