Timbog ng mga tauhan ng District Drug Enforcement Unit (DDEU) ng Eastern Police District (EPD) ang isang 16-anyos na binatilyo at nasamsaman ang mahigit sa Php1.3 milyong halaga ng shabu sa ikinasang buy-bust operation nito lamang Biyernes, Mayo 30, 2025, dakong 3:00 ng madaling araw sa Barangay Pinagbuhatan, Pasig City.
Kinilala ni Police Brigadier General Aden T. Lagradante, Officer-In-Charge ng EPD, ang suspek na si alyas “Ken,” itinuturing na Newly Identified High Value Individual (HVI).
Narekober mula sa suspek ang 30 piraso ng heat-sealed plastic sachets na naglalaman ng hinihinalang shabu na may tinatayang kabuuang timbang na 191.1 gramo at may Standard Drug Price na Php1,302,880 at isang plastic sachet ng pinaghihinalaang kush marijuana na may bigat na 15.8 gramo na tinatayang nagkakahalaga ng Php23,700.
Mahaharap si alyas “Ken” sa kasong paglabag sa Section 5 (Selling of Dangerous Drugs) at Section 11 (Possession of Dangerous Drugs) ng Article II ng Republic Act 9165, o ang “Comprehensive Dangerous Drugs Act of 2002.”
Kasalukuyang nasa pangangalaga ng City Social Welfare and Development Office (CSWD) ng Pasig ang suspek dahil ito ay menor-de-edad.
“Ang tagumpay na ito ay isang hakbang patungo sa ating layunin na magkaroon ng isang mapayapa, ligtas, at drug-free na komunidad. Inaasahan ko ang patuloy na dedikasyon ng ating mga kapulisan sa pagpapanatili ng kaayusan sa buong nasasakupan ng Eastern Police District,” ani PBGen Lagradante.
Source: EPD PIO
Panulat ni PMSg Remelin M Gargantos
