Biliran, Leyte – Inaresto ng Biliran Police Provincial Office ang labinlimang lumabag sa liquor ban sa tatlong magkakahiwalay na operasyon sa munisipalidad ng Almeria at Naval, Biliran noong Mayo 8, 2022.
Ayon kay Police Colonel Joel Serrano, Acting Provincial Director ng BPPO, ang mga nasabing operasyon ay naaayon sa Article XXII (Omnibus Election Code) sa ilalim ng Resolution No. 10746 ng Commission on Elections (COMELEC) na nagpapataw ng pagbabawal sa pagbebenta, pagbibigay, pag-aalok, pagbili, paghahatid o pag-inom ng nakalalasing na alak sa panahon ng Mayo 8-9, 2022 kaugnay ng May 9, 2022 National at Local Elections.
Ayon pa kay PCol Serrano, ang nasabing mga operasyon ay binubuo ng magkasanib na mga operatiba mula sa COMELEC, Biliran Province sa pangunguna ni Atty. Sabino C Mejarito, Provincial Election Supervisor; Biliran Police Provincial Office sa pangunguna ni PLt Benigno Avila; 93rd IB, Philippine Army, sa pangunguna ni 2nd Lt Alvin Christian G Flores, Bravo Coy Executive Officer; Naval MPS sa pangunguna ni PMaj Rayn C Delima, OIC; Almeria MPS sa pangunguna ni PLt Edwin Simbajon, OIC; at mga tauhan mula sa Biliran Provincial Mobile Force Company sa pangunguna ni PSSg Johnny Aragon.
Bandang ala- 1:20 ng madaling araw ng May 8, 2022, nagsagawa ng Liquor Ban operation ang mga operatiba sa Sto. Rosario, Naval, Biliran na nagresulta sa pagkahuli ng apat na indibidwal.
Sa parehong araw, dakong 1:50 AM, nagsagawa ng Liquor Ban operation ang parehong mga operatiba sa Brown Beach, Brgy. Agpangi, Naval, Biliran na nagresulta sa pagkahuli ng walong indibidwal.
Kaugnay nito, alas-3:30 ng madaling araw ng parehong araw, isa pang operasyon ang isinagawa na nagresulta sa pagkakaaresto sa tatlo pang indibidwal sa Brgy. Pulang Bato, Almeria, Biliran.
Pinaalalahanan naman ni PCol Serrano ang lahat na sumunod sa mga alituntunin at regulasyon ng Commission on Election (COMELEC) na huwag gumawa/lumabag sa anumang probisyon ng batas at maging isang mamamayang sumusunod sa batas.
###
Panulat ni Patrolwoman Rialyn B Valdez
