Arestado ng Philippine National Police (PNP) ang 14 pekeng mga dentista sa loob ng dalawang buwang crackdown sa Mindanao.
Ayon sa pahayag ni Police Brigadier General Bernard Yang, PNP Anti-Cybercrime Group (ACG) Director, nitong ika-8 ng Mayo, naaresto ang mga suspek sa siyam na magkakahiwalay na operasyon sa pagitan ng Marso 12 at Abril 28 sa Cotabato City, Zamboanga City, Davao City, Tagum City, at Ipil town sa Zamboanga Sibugay dahil sa umano’y pagsasagawa ng dentistry na walang lisensya.
Sinabi ni PBGen Yang na nakipag-ugnayan ang pulisya sa Philippine Dental Association (PDA) upang i-verify kung ang mga indibidwal ay mga lisensyadong dentista bago nila isinagawa ang mga operasyon.
Idinetalye din ng ACG Director na isa sa mga suspek o alyas “Bart”, 25-anyos at inaresto noong Abril 28 sa Cotabato City, ay nag-alok ng kanyang serbisyo na isinagawa sa mga motel sa halagang Php1,000 kumpara sa propesyonal na serbisyo na karaniwang nagkakahalaga ng Php20,000 hanggang Php40,000. Ang mga gamit ng suspek ay pawang mga online products, at maging ang pag-aaral niya ng dentistry ay sa online din.
Kabilang sa mga nailigtas sa operasyon noong Abril 11 sa Davao City ay isang Child in Conflict with the Law (CICL).
Nahaharap ang mga suspek sa kasong paglabag sa Republic Act 9484 o “Philippine Dental Act” in relation to RA 10175 o “Cybercrime Prevention Act”.
Pinapaalalahanan ng PNP ang publiko na sumangguni sa mga lehitimong mga dental clinics at huwag basta basta maniniwala sa mga inaalok na serbisyo online.
