Iba’t ibang matataas na kalibre ng baril ang nasamsam ng pulisya at militar sa walong indibidwal sa Purok Dunguan, Barangay Kudarangan, Midsayap, Cotabato (SGA-BARMM), bandang 4:00 ng hapon nito lamang ika-23 ng Nobyembre 2023.
Kinilala ni Police Brigadier General Jimili Macaraeg, Regional Director ng Police Regional Office 12, ang mga naarestong suspek na sina alyas “Tha Kalim”, 37; “Jackson”, magsasaka; “Nasrullah”, 25; “Abdulpata”, 25; “Abdulkadir”, 44; “Ibrahim”, 28; “Jerry”, 41; at si alyas “Mamaali”, na pawang residente ng Midsayap, Cotabato.
Sa ulat ng natanggap ni PBGen Macaraeg mula sa Midsayap Municipal Police Station, habang nagsagawa ng clearing operation at imbestigasyon kaugnay sa nangyaring engkwentro sa naturang lugar dakong 12:00 ng tanghali nang biglang pinaputukan ang mga ito ng mga suspek dahilan upang magsagawa ng hot-pursuit operation.
Umabot sa 14 na matataas na iba’t ibang uri ng mga baril, mga magazine at mga bala ang nakumpiska.
Kabilang sa mga nakumpiska ang pitong yunit ng M14 rifle, pitong yunit ng M16 rifle na may mga kasamang magazine at mga bala.
Pinapurihan naman ni PBGen Macaraeg ang matagumpay na operasyon ng mga tauhan ng Midsayap MPS, 34th Infantry Battalion ng Philippine Army, 2nd Cotabato Provincial Mobile Force Company, Cotabato Police Provincial Office-Intelligence Unit, Regional Special Operations Group 12, 1203rd Maneuver Company ng RMFB 12, at Regional Intelligence Division 12 na tapat sa tungkulin upang mapanatili ang kaayusan at katahimikan sa kanilang nasasakupan.
Panulat ni Patrolman Khnerwin Jay A Medelin
