Nakatanggap ng dugo ang isang 12 taong gulang na batang babae mula sa isang magiting na pulis ng Caraga matapos itong magpositibo sa dengue at ma-admit sa Adela Serra Ty Memorial Medical Center noong ika-30 ng Setyembre, 2024.
Ayon kay Patrolman James Nico S. Guillen, 28 taong gulang, content creator at residente ng Tandag, Surigao del Sur, kasalukuyang nakatalaga sa Police Community Affairs and Development (PCAD) ng Surigao del Sur Police Provincial Office, kinakailangan ng bata ang platelet transfusion dahil bumaba ang kanyang platelet counts, na isa sa mga kritikal na epekto ng dengue.
Ani Pat Guillen, tatlo silang nagnais magbigay ng dugo na may blood type na A+, ngunit ang dalawa niyang kasamahan ay hindi pumasa sa blood screening.
Ang kanyang inspirasyon sa pagtulong ay nagmula sa sariling karanasan nang ang kanyang anak ay magpositibo rin sa dengue noong Setyembre 1, 2024.
“Mag-donate po tayo dahil buhay ang nakasalalay. Isang araw, maaaring tayo naman ang mangailangan ng donor para sa ating mga mahal sa buhay. Kung alam mong malinis ang dugo mo at kaya mong mag-donate upang makapagligtas ng buhay ng iba, gawin mo ito,” dagdag pa ni Pat Guillen.
Panulat ni Patrolwoman Karen Mallillin
