Kinumpirma ni Police Regional Office 6 spokesperson Police Lieutenant Colonel Arnel Solis na magpapadala ng 100 na pulis ang Iloilo City Police Office (ICPO) at Iloilo Police Provincial Office (IPPO) sa Davao City nito lamang ika-27 ng Agosto 2024.
Ang hakbang na ito ay bahagi ng pagsisikap ng mga kapulisan mula Iloilo na magbigay suporta sa mahigit 2,000 pulis na unang na-deploy sa Buhangin, Davao City, hinggil sa patuloy na tumitinding tensyon sa pagitan ng mga miyembro ng Kingdom of Jesus Christ (KOJC) at mga kapulisan.
Ang PNP ay patuloy sa paghahanap sa puganteng lider ng KOJC na si Pastor Apollo Quiboloy, na sinasabing nagtatago sa ilalim ng lupa ng kanilang compound.
Sa kabila ng mga hamon, nananatili ang determinasyon ng Pambansang Pulisya na magpatupad ng batas at magpanatili ng kapayapaan sa lugar.
Napag-alamang magpapadala ng dalawa hanggang tatlong personnel mula sa bawat police station sa Iloilo patungo sa Davao City.
Ang pagde-deploy ng mga karagdagang pulis mula sa Iloilo ay nagpapakita ng kanilang matibay na suporta at ito ay isang patunay ng dedikasyon ng Pambansang Pulisya na tiyakin ang kaligtasan at kaayusan sa anumang sulok ng bansa.
Source: K5 NEWS FM ILOILO
Panulat ni Pat Justine Mae Jallores
